హైదరాబాద్, 2026-07-13
తెలంగాణ రాష్ట్ర ముఖ్యమంత్రి రేవంత్ రెడ్డి నివాసం ముందు ఆమ్ ఆద్మీ పార్టీ (AAP) నాయకులు, కార్యకర్తలు భారీ ధర్నా నిర్వహించారు. ప్రభుత్వ పాఠశాలల్లో నాణ్యమైన విద్య, మౌలిక వసతుల కల్పనతో పాటు, బోధన్లోని ఒక పాఠశాలలో ఉర్దూను ప్రథమ భాషగా ఎంచుకునే మైనారిటీ విద్యార్థులకు అడ్మిషన్లు నిరాకరించడాన్ని నిరసిస్తూ ఈ ఆందోళన చేపట్టారు.
తెలంగాణ రాష్ట్ర ముఖ్యమంత్రి రేవంత్ రెడ్డి నివాసం ముందు ఆమ్ ఆద్మీ పార్టీ (AAP) నాయకులు, కార్యకర్తలు భారీ ధర్నా నిర్వహించారు. నిజామాబాద్ జిల్లా ఆమ్ ఆద్మీ పార్టీ అధ్యక్షుడు సమీర్ అహ్మద్ నేతృత్వంలో జరిగిన ఈ నిరసన కార్యక్రమంలో బోధన్ నియోజకవర్గ ఇన్ఛార్జ్ జునైద్ అహ్మద్, రూరల్ నియోజకవర్గ ఇన్ఛార్జ్ జుబేర్ అహ్మద్లతో పాటు రాష్ట్రవ్యాప్తంగా ఉన్న పార్టీ ముఖ్య నేతలు, కార్యకర్తలు పెద్ద సంఖ్యలో పాల్గొన్నారు.
ఈ సందర్భంగా జిల్లా అధ్యక్షుడు సమీర్ అహ్మద్ మాట్లాడుతూ.. ప్రభుత్వ పాఠశాలల్లో చదువుకునే విద్యార్థులందరికీ నాణ్యమైన, ఉచిత విద్యను అందించడం ప్రభుత్వ కనీస బాధ్యత అని స్పష్టం చేశారు. రాష్ట్రంలోని ప్రభుత్వ పాఠశాలల రూపురేఖలను మార్చాలని, విద్యార్థులకు అవసరమైన ప్రాథమిక సౌకర్యాలను వెంటనే కల్పించాలని డిమాండ్ చేశారు.
పాఠశాలల ఆధునీకరణ: శిథిలావస్థకు చేరిన ప్రభుత్వ పాఠశాలల భవనాలకు వెంటనే మరమ్మతులు చేపట్టి, మౌలిక వసతులు కల్పించాలి. ఉపాధ్యాయుల నియామకం: పాఠశాలల్లో తీవ్రంగా ఉన్న ఉపాధ్యాయుల కొరతను వెంటనే భర్తీ చేయాలి. ప్రాథమిక సౌకర్యాలు: బాలబాలికలకు ప్రత్యేక మరుగుదొడ్లు, స్వచ్ఛమైన తాగునీటి సౌకర్యాన్ని కల్పించాలి. నాణ్యమైన విద్య, వసతులు పొందడం ప్రతి విద్యార్థి హక్కు. ఉర్దూ ప్రథమ భాషగా అడ్మిషన్లు: బోధన్లోని శక్కర్నగర్ ప్రభుత్వ మధు మాలంచ హైస్కూల్ (ఇంగ్లీష్ మీడియం) లో ఉర్దూను ప్రథమ భాషగా ఎంచుకోవాలనుకునే మైనారిటీ విద్యార్థులకు అడ్మిషన్లు నిరాకరించడంపై మండిపడ్డారు. దశాబ్దాలుగా కొనసాగుతున్న విద్యా విధానాన్ని యథాతథంగా ఉంచుతూ, విద్యార్థుల భవిష్యత్తును దృష్టిలో ఉంచుకుని తక్షణమే అడ్మిషన్ల ప్రక్రియను ప్రారంభించాలని, ఉర్దూ ఉపాధ్యాయులను నియమించాలని డిమాండ్ చేశారు.
ఈ క్రమంలో పార్టీ జెండాలు చేతబూని "విద్య ప్రతి ఒక్కరి హక్కు... ఒకరు పెట్టే భిక్ష కాదు" మరియు "ఉర్దూ మీడియం విద్యార్థుల హక్కులను కాపాడాలి" అనే నినాదాలతో కూడిన పోస్టర్లను ప్రదర్శిస్తూ నాయకులు, కార్యకర్తలు సీఎం నివాస ముట్టడికి ప్రయత్నించారు. "డౌన్ డౌన్ సీఎం" అంటూ పెద్ద పెట్టున నినాదాలు చేస్తూ రోడ్డుపై బైఠాయించారు. ముట్టడికి యత్నించిన నిరసనకారులను పోలీసులు బారికేడ్ల వద్ద అడ్డుకున్నారు. బారికేడ్లను తోసుకుంటూ ముందుకు వెళ్లేందుకు ప్రయత్నించిన ఆమ్ ఆద్మీ పార్టీ నాయకులను, కార్యకర్తలను పోలీసులు బలవంతంగా ఈడ్చుకెళ్లి, పోలీస్ వాహనాల్లో (వ్యాన్లలో) ఎక్కించి స్థానిక పోలీస్ స్టేషన్కు తరలించారు.
ప్రభుత్వం ఇప్పటికైనా ఈ డిమాండ్లపై సానుకూలంగా స్పందించి, ప్రభుత్వ విద్యా వ్యవస్థను సంక్షోభం నుండి రక్షించాలని సమీర్ అహ్మద్ కోరారు. లేని పక్షంలో ఆమ్ ఆద్మీ పార్టీ ఆధ్వర్యంలో రాష్ట్రవ్యాప్తంగా ఉద్యమాలను తీవ్రతరం చేస్తామని హెచ్చరించారు.
