చిన్నతనం నుండే ట్రాఫిక్ నిబంధనలపై అవగాహన పెంచుకోవడం ద్వారా రోడ్డు ప్రమాదాలను నియంత్రించవచ్చని ట్రాఫిక్ ఏసీపీ మస్తాన్ అలీ అన్నారు. నిజామాబాద్లోని శ్రీ చైతన్య పాఠశాలలో విద్యార్థులకు రోడ్డు భద్రతపై ఆయన ప్రత్యేక అవగాహన కల్పించారు.
నిజామాబాద్ బైపాస్ రోడ్డులో గల శ్రీ చైతన్య పాఠశాలలో ట్రాఫిక్ ఏసీపీ మస్తాన్ అలీ ఆధ్వర్యంలో రోడ్డు భద్రతపై అవగాహన కార్యక్రమం జరిగింది. ఈ కార్యక్రమంలో సుమారు 1200 మంది విద్యార్థులు పాల్గొన్నారు.
విద్యార్థులకు మైనర్ డ్రైవింగ్ వల్ల కలిగే ప్రమాదాలు, హెల్మెట్ ధరించడం, ట్రిపుల్ రైడింగ్ చేయకపోవడం, మద్యం సేవించి వాహనాలు నడపడం వల్ల ఎదురయ్యే పరిణామాలు, చట్టపరమైన చర్యల గురించి ఏసీపీ వివరించారు.
రోడ్డు భద్రతా నియమాలను పాటించడం ద్వారా తమతో పాటు ఇతరుల ప్రాణాలను కూడా కాపాడుకోవచ్చని ఆయన విద్యార్థులకు సూచించారు. తల్లిదండ్రులు కూడా మైనర్ పిల్లలకు వాహనాలు ఇవ్వకుండా బాధ్యతాయుతంగా వ్యవహరించాలని కోరారు.
ప్రమాద రహిత సమాజ నిర్మాణానికి ప్రతి ఒక్కరూ ట్రాఫిక్ నియమాల పట్ల బాధ్యతగా వ్యవహరించాలని ట్రాఫిక్ ఏసీపీ పిలుపునిచ్చారు. ఈ కార్యక్రమంలో పాఠశాల ప్రిన్సిపాల్ గురుచరణ్, ఉపాధ్యాయులు, సిబ్బంది పాల్గొన్నారు.
