రంగారెడ్డి జిల్లా మంచాల మండలం ఆరుట్లలో నూతనంగా నిర్మించిన తెలంగాణ పబ్లిక్ స్కూల్ను ముఖ్యమంత్రి ఎ. రేవంత్ రెడ్డి బుధవారం ప్రారంభించారు. ఈ పాఠశాల రాష్ట్రంలోని ప్రభుత్వ పాఠశాల విద్యార్థులందరికీ స్ఫూర్తిదాయకంగా నిలవాలని ఆయన ఆకాంక్షించారు.
ముఖ్యమంత్రి ఎ. రేవంత్ రెడ్డి ఆరుట్లలోని తెలంగాణ పబ్లిక్ స్కూల్ను ప్రారంభించి, పాఠశాల ఆవరణను క్షుణ్ణంగా పరిశీలించారు. ప్రభుత్వ పాఠశాలల పట్ల ఉన్న అపోహలను తొలగించి, మట్టిలో మాణిక్యాలను వెలికితీయాలనే లక్ష్యంతో ఈ పాఠశాలను ఏర్పాటు చేసినట్లు తెలిపారు. రాష్ట్రంలోని 27 లక్షల మంది ప్రభుత్వ పాఠశాల విద్యార్థులకు ఈ కార్యక్రమాన్ని అంకితం చేశారు.
ప్రారంభోత్సవం అనంతరం, ముఖ్యమంత్రి ఉదయం బ్రేక్ఫాస్ట్ పథకాన్ని ప్రారంభించి, విద్యార్థులతో కలిసి అల్పాహారం స్వీకరించారు. అత్యాధునిక తరగతి గదులు, లైబ్రరీ, ప్రయోగశాలలు, డిజిటల్ క్లాసులను సందర్శించి, విద్యార్థులకు అందుబాటులో ఉన్న సౌకర్యాలను పరిశీలించారు. ఉచిత రవాణా కోసం ఏర్పాటు చేసిన బస్సులను కూడా పరిశీలించారు.
పాఠశాలలోని వంటగదిని సందర్శించిన ముఖ్యమంత్రి, వంటవారితో సంభాషించి, పూరీ తయారీలో స్వయంగా పాల్గొన్నారు. పాఠశాల మేనేజ్మెంట్ కమిటీ సభ్యులు, ఉపాధ్యాయులతో సమావేశమై, పాఠశాల కార్యకలాపాలపై ఆరా తీశారు. క్రీడా మైదానాలు, హాళ్లను పరిశీలించి, విద్యార్థులతో కలిసి సరదాగా ఫుట్బాల్ ఆడారు.
ఏర్పాటు చేసిన సభలో ముఖ్యమంత్రి మాట్లాడుతూ, ఆరుట్ల పబ్లిక్ స్కూల్ తెలంగాణకు రోల్ మోడల్గా నిలవాలని ఆకాంక్షించారు. ప్రభుత్వ పాఠశాలల్లో చదువుకునే విద్యార్థులు కూడా ఉన్నత శిఖరాలను అధిరోహించగలరనే విశ్వాసాన్ని కుటుంబాల్లో నింపాలని, ఈ పాఠశాల ఆ లక్ష్య సాధనకు దోహదపడుతుందని అన్నారు. విద్యార్థులు, ఉపాధ్యాయులు, మేనేజ్మెంట్ కమిటీ సభ్యులను అభినందించారు.
