భారతదేశ మాజీ ప్రధాని స్వర్గీయ శ్రీమతి ఇందిరా గాంధీ వర్ధంతి, స్వర్గీయ సర్దార్ వల్లభాయ్ పటేల్ జయంతి నిజామాబాద్ జిల్లా కాంగ్రెస్ పార్టీ కార్యాలయంలో ఆయా నాయకుల చిత్రపటాలకు పూలమాలలు వేసి ఘనంగా నివాళులు అర్పించారు. ఈ కాంగ్రెస్ నాయకులు వారి దేశ సేవలను స్మరించుకున్నారు.
నగర డిసిసి అధ్యక్షులు బొబ్బిలి రామకృష్ణ మాట్లాడుతూ, ఇందిరా గాంధీ దేశభక్తి, నాయకత్వ లక్షణాలను చిన్నతనం నుంచే అలవర్చుకున్నారని తెలిపారు. ఆమెను ప్రపంచం భారత ఉక్కు మహిళగా పిలుస్తుందని, 1966లో ప్రధానిగా బాధ్యతలు చేపట్టి, క్లిష్ట సమయాల్లో ధైర్యమైన నిర్ణయాలతో దేశాన్ని ప్రగతి పథంలో నడిపించారని అన్నారు. 14 బ్యాంకుల జాతీయకరణ (1969) ద్వారా సామాన్య ప్రజలకు, రైతులకు బ్యాంకింగ్ సేవలు అందుబాటులోకి తెచ్చారని, 1971లో పాకిస్తాన్పై విజయం సాధించి, బంగ్లాదేశ్కు స్వాతంత్ర్యం తెచ్చిపెట్టడంలో ఆమె దౌత్యవేత్తత, ధైర్యం ప్రపంచ దృష్టిని ఆకర్షించాయని తెలిపారు. హరిత విప్లవం ద్వారా వ్యవసాయ రంగాన్ని ఆధునీకరించి, భారతదేశాన్ని ఆహార ధాన్యాల విషయంలో స్వయంసమృద్ధి వైపు తీసుకెళ్లారని అన్నారు. రాజభరణాల రద్దు, సంస్థానాధీశుల ప్రత్యేక హక్కులను రద్దు చేసి, ప్రజాస్వామ్య సమానత్వాన్ని నెలకొల్పారని గుర్తు చేశారు. హత్యకు గురవ్వడానికి ముందు (1980లో భువనేశ్వర్లో) ఇందిరా గాంధీ చేసిన నా రక్తంలో ప్రవహించే ప్రతి బొట్టు ఈ దేశాన్ని బలపరచడానికి, ఏకీకృతం చేయడానికి ఉపయోగపడుతుంది అనే వ్యాఖ్యను ప్రస్తావించారు. ఆ మాటల ప్రకారమే, 1984లో దేశ సమగ్రత కోసం ప్రాణాలర్పించారని అన్నారు. ఈ రోజు ఆమె వర్ధంతి రోజున, ఇందిరా గాంధీ గారి త్యాగాన్ని, దేశ సేవను స్మరించుకుంటూ, ఆమె చూపిన ధైర్యం, క్రమశిక్షణ, దేశభక్తి మార్గంలో నడవాలని ఆశిస్తున్నట్లు తెలిపారు. ఈ బొబ్బిలి రామకృష్ణ ఆ మహనీయులకు ఘనంగా నివాళులు అర్పించారు.
అలాగే, భారత దేశాన్ని ఐక్యం చేసిన మహానాయకుడు, భారత ఉక్కు మనిషి స్వర్గీయ సర్దార్ వల్లభ్భాయ్ పటేల్ జయంతి ప్రతి సంవత్సరం ఆయన జయంతిని జాతీయ ఐక్యతా దివస్ గా జరుపుకుంటామని అన్నారు. ఆయన ధైర్యసాహసాలు, పట్టుదల కలిగిన వ్యక్తి అని, తొలి ఉప ప్రధానిగా, హోం మంత్రిగా దేశానికి ఆయన సేవలు అపారమైనవని కొనియాడారు. స్వాతంత్ర్యం సమయంలో 560కి పైగా సంస్థానాలుగా విడిపోయిన భారతదేశాన్ని, సమర్థవంతంగా, దౌత్యనీతితో, ఉక్కు సంకల్పంతో భారత్ యూనియన్లో విలీనం చేసి, నేటి సమైక్య భారతదేశాన్ని నిర్మించిన ఘనత సర్దార్ పటేల్ కే దక్కుతుందని అన్నారు. ముఖ్యంగా హైదరాబాద్, జునాగఢ్, కాశ్మీర్ వంటి సంస్థానాలను భారత్లో కలిపిన తీరు ఆయన పరిపాలనా దక్షతకు నిదర్శనమని తెలిపారు. గాంధీజీ ప్రారంభించిన బార్డోలీ సత్యాగ్రహంలో రైతులకు నాయకత్వం వహించి విజయం సాధించినందుకే ఆయనకు సర్దార్ బిరుదు వచ్చిందని పేర్కొన్నారు. ఈ కార్యక్రమంలో యూత్ కాంగ్రెస్ అధ్యక్షులు విపుల్ గౌడ్, ఎఐసిసి కో ఆర్డినేటర్ గన్ రాజ్, జిల్లా ఉపాధ్యక్షులు కౌదపు శరత్, నగర ఉపాధ్యక్షుల అంతరెడ్డి విజయ్ పాల్ రెడ్డి, జిల్లా అధ్యక్షులు యాదగిరి, బంటు బలరాం, మహిళ నాయకులు పోలా ఉష, చంద్రకళ, విజయలక్ష్మి, స్వప్న, ఆమరాజు, ఆకుల రాజు, పోలా శంకర్, ఆదే ప్రవీణ్ మరియు తదితరులు పాల్గొన్నారు.
