ఉద్యోగాల కల్పనను ప్రోత్సహించేందుకు కర్ణాటక ప్రభుత్వం కీలక నిబంధనలు తీసుకొచ్చింది. ఉద్యోగ నిధి పథకం కింద సూక్ష్మ, చిన్న, మధ్యతరహా పరిశ్రమలకు (ఎంఎస్ఎంఈ) ఈ షరతులు వర్తిస్తాయి. ప్రభుత్వం ఇచ్చే ప్రోత్సాహకాన్ని పొందిన తర్వాత మూడు నెలల్లోపు ఉద్యోగిని తొలగిస్తే, ఇప్పటికే చెల్లించిన మొత్తాన్ని వడ్డీతో సహా తిరిగి వసూలు చేస్తారు.
ఈ పథకం ద్వారా రాష్ట్రంలోని వెనుకబడిన జిల్లాల్లో స్థానికంగా ఉద్యోగ అవకాశాలను పెంచడం ప్రభుత్వ లక్ష్యం. అర్హత కలిగిన ఎంఎస్ఎంఈ సంస్థలు సృష్టించే ప్రతి కొత్త ఉద్యోగానికి నెలకు రూ.2,500 చొప్పున రెండేళ్ల పాటు ప్రోత్సాహకం అందిస్తారు. ఈ పథకం ద్వారా సుమారు లక్ష ఉద్యోగాలను సృష్టించాలనే లక్ష్యం ఉండగా, ప్రభుత్వంపై దాదాపు రూ.300 కోట్ల వ్యయం అవుతుందని అంచనా.
11 జిల్లాలకు వర్తింపు
ఉద్యోగ నిధి పథకాన్ని రాష్ట్రంలోని వెనుకబడిన ప్రాంతాలుగా గుర్తించిన జిల్లాల్లో అమలు చేయనున్నారు. యాదగిరి, బీదర్, రాయచూరు, కలబురగి, కొప్పళ, విజయనగర, బెలగావి, గదగ్, హావేరి, విజయపుర, బాగలకోట జిల్లాలు ఇందులో ఉన్నాయి.
తప్పుడు వివరాలు ఇస్తే చర్యలు
ఉద్యోగాలు కల్పించినట్లు తప్పుడు వివరాలు లేదా నకిలీ పత్రాలు సమర్పించి ప్రోత్సాహకం పొందినట్లు తేలితే ప్రభుత్వం చర్యలు తీసుకోనుంది. ఇప్పటికే చెల్లించిన మొత్తాన్ని తిరిగి వసూలు చేయడంతో పాటు, వర్తించే ఇతర చట్టాలు, నిబంధనల ప్రకారం కూడా చర్యలు తీసుకునే అవకాశం ఉంది.
పథకం అమలును జిల్లా స్థాయిలో కమిటీలు పనిచేస్తాయి. ప్రోత్సాహకం విడుదలకు ముందు ఎంపికైన సంస్థల్లో కొంత శాతం యూనిట్లను భౌతికంగా తనిఖీ చేయాలని ప్రభుత్వం నిబంధనలు రూపొందించింది.
ఉద్యోగ కల్పన పేరుతో ప్రోత్సాహకం తీసుకుని వెంటనే ఉద్యోగులను తొలగించకుండా ఉండేలా ఈ నిబంధనను తీసుకొచ్చినట్లు తెలుస్తోంది.
