ఆర్థిక ఇబ్బందులు, అప్పుల భారాన్ని తట్టుకోలేక నందిపేట మండల కేంద్రానికి చెందిన హార్డ్వేర్ వ్యాపారి ఎర్రం పవన్ కుమార్ (45) ఆత్మహత్యకు పాల్పడ్డారు. చికిత్స పొందుతూ ఆయన మృతి చెందారు. ఈ ఘటన స్థానికంగా కలకలం సృష్టించింది.
నందిపేటలో 'రాజేష్ హార్డ్వేర్' దుకాణం నిర్వహిస్తున్న పవన్ కుమార్, వ్యాపార విస్తరణ కోసం అప్పులు చేశారు. అయితే, కస్టమర్లు చెల్లించాల్సిన బాకీలు పేరుకుపోవడంతో ఆయన తీవ్ర ఆర్థిక ఒత్తిడికి గురయ్యారు. మార్కెట్ అప్పులు, వాటిపై వడ్డీలు పెరిగిపోవడంతో పరిస్థితి చేయిదాటిపోయింది.
కుటుంబ సభ్యుల కథనం ప్రకారం, పవన్ కుమార్ ఇటీవల కాలంలో తీవ్ర మానసిక ఒత్తిడితో బాధపడుతూ, తన సమస్యలను వారితో పంచుకునేవారు. వ్యాపారంలో ఎదురవుతున్న ఇబ్బందులు, ఆర్థిక భారం ఆయనను కుంగదీశాయి.
ఈ నెల 17వ తేదీన లక్కంపల్లి శివారు ప్రాంతంలో గడ్డిమందు తాగి అపస్మారక స్థితిలో పడిపోయిన పవన్ కుమార్ ను కుటుంబ సభ్యులు, స్థానికులు వెంటనే జిల్లా కేంద్రంలోని ప్రైవేట్ ఆసుపత్రికి తరలించారు. అక్కడ వైద్యుల చికిత్స అందించినప్పటికీ, ఆయన పరిస్థితి విషమించి గురువారం సాయంత్రం తుదిశ్వాస విడిచారు.
మృతుడి భార్య హారిక ఫిర్యాదు మేరకు నందిపేట పోలీసులు కేసు నమోదు చేశారు. మృతదేహానికి పోస్టుమార్టం అనంతరం కుటుంబ సభ్యులకు అప్పగించారు. ఘటనపై సమగ్ర దర్యాప్తు జరుగుతోందని ఎస్ఐ వినయ్ తెలిపారు.
