కృత్రిమ మేధ (ఏఐ) ప్రభావం వ్యాపార రంగంలో వేగంగా పెరుగుతున్న నేపథ్యంలో, దేశంలోని ప్రముఖ బిజినెస్ స్కూళ్లు ఎంబీఏ కోర్సుల్లో కీలక మార్పులు చేస్తున్నాయి. విద్యార్థులకు సంప్రదాయ నిర్వహణ సూత్రాలతో పాటు ఏఐ సాధనాలను ఉపయోగించడం, సమాచారాన్ని విశ్లేషించడం, వాటి ఆధారంగా వ్యాపార నిర్ణయాలు తీసుకోవడం నేర్పించడంపై దృష్టి సారిస్తున్నాయి.
మార్కెటింగ్, ఆర్థిక నిర్వహణ, మానవ వనరుల వంటి ప్రధాన సబ్జెక్టుల్లో ఏఐను భాగం చేస్తున్నారు. జనరేటివ్ ఏఐ, డేటా విశ్లేషణ, బాధ్యతాయుతమైన ఏఐ వినియోగంపై ప్రత్యేక పాఠ్యాంశాలను కూడా ప్రవేశపెడుతున్నారు.
ఉద్యోగ నియామకాల్లో ఏఐ సాధనాలపై అవగాహనకు ప్రాధాన్యం పెరుగుతుండటంతో ఈ మార్పులు చోటుచేసుకుంటున్నాయి. గ్రాడ్యుయేట్ మేనేజ్మెంట్ అడ్మిషన్ కౌన్సిల్ నిర్వహించిన అధ్యయనంలోనూ, భవిష్యత్తులో ఉద్యోగులకు అవసరమయ్యే కీలక నైపుణ్యాల్లో ఏఐ సాధనాలను ఉపయోగించే సామర్థ్యం ఒకటిగా గుర్తించారు.
2026 గ్లోబల్ పర్స్పెక్టివ్స్ సర్వేలో 22 మంది డీన్లు, విద్యారంగ నాయకుల అభిప్రాయాలను పరిశీలించగా, ఏఐ ప్రభావం, మారుతున్న ఉద్యోగదాతల అంచనాలు, ఎంబీఏ కోర్సులపై పెరుగుతున్న అవసరాలు భారతీయ బిజినెస్ స్కూళ్లకు ప్రధాన సవాళ్లుగా వెల్లడయ్యాయి.
జైపూరియా బిజినెస్ స్కూల్లో ప్రత్యేక కోర్సు
జైపూరియా స్కూల్ ఆఫ్ బిజినెస్ మొదటి సంవత్సరం పాఠ్యప్రణాళికలో, వ్యాపార నాయకుల కోసం అభివృద్ధి చెందుతున్న సాంకేతికతలు, ఏఐపై 30 గంటల కోర్సును చేర్చింది. బిజినెస్ అనలిటిక్స్ ప్రత్యేక విభాగంలోనూ ఏఐకు ప్రాధాన్యం ఇస్తోంది. విద్యార్థులు ఏఐ సాధనాలను ఎలా ఉపయోగించాలి వాటి ఫలితాలను ఎలా అంచనా వేయాలి అనిశ్చిత పరిస్థితుల్లో సరైన నిర్ణయాలు ఎలా తీసుకోవాలి వంటి అంశాలను నేర్చుకునేలా పాఠ్యప్రణాళికను రూపొందిస్తున్నారు.
ఈ సంస్థ డైరెక్టర్ తపన్ కుమార్ నాయక్ అభిప్రాయం ప్రకారం, జనరేటివ్ ఏఐ అందుబాటులోకి రావడంతో అనిశ్చిత పరిస్థితుల్లో సరైన నిర్ణయాలు తీసుకునే నైపుణ్యాన్ని పెంపొందించడం మరింత ముఖ్యమైంది. ఏఐ భద్రత, బాధ్యతాయుతమైన వినియోగం వంటి అంశాలకూ విద్యాసంస్థలు ప్రాధాన్యం ఇవ్వాలని ఆయన సూచించారు. విద్యార్థులకు చాట్జీపీటీ, క్లాడ్ వంటి సాధనాల పరిచయంతో పాటు ఏఐ ఆధారిత అనుకరణ అభ్యాసాలను అందించడం ఉపయోగకరమని ఆయన పేర్కొన్నారు.
అన్ని మేనేజ్మెంట్ సబ్జెక్టుల్లో ఏఐ
గురుగ్రామ్లోని గ్రేట్ లేక్స్ ఇన్స్టిట్యూట్ ఆఫ్ మేనేజ్మెంట్ ఏఐను ఒక ప్రత్యేక సబ్జెక్టుకే పరిమితం చేయకుండా, వివిధ నిర్వహణ విభాగాల్లో అనుసంధానిస్తోంది. సంస్థ డైరెక్టర్ రాజ్ కృష్ణన్ శంకర్ తెలిపిన వివరాల ప్రకారం, బోధన, అభ్యాస ప్రక్రియల్లో ఏఐ ఆధారిత విధానాలకు ప్రాధాన్యం ఇస్తున్నారు.
హర్యానాలోని బీఎంఎల్ ముంజాల్ విశ్వవిద్యాలయం కూడా ఇదే తరహా విధానాన్ని అనుసరిస్తోంది. వ్యాపార వ్యూహాల రూపకల్పన, మార్కెటింగ్ ప్రణాళికలు, ఆర్థిక అంచనాలు, కార్యకలాపాల నిర్వహణ వంటి అంశాల్లో ఏఐ వినియోగం పెరుగుతోందని విశ్వవిద్యాలయ ప్రతినిధులు పేర్కొన్నారు. అందుకే విద్యార్థులు తరగతి గదుల్లో సిద్ధాంతాలను నేర్చుకోవడంతో పాటు, వాస్తవ వ్యాపార పరిస్థితుల్లో ఏఐను ఉపయోగించే అనుభవాన్ని పొందేలా చర్యలు తీసుకుంటున్నారు.